Suedia dhe Portugalia ndajnë pikët, Danimarka merr kreun e tabeles

Ndeshja derbi e grupit 1, ajo mes Suedisë dhe Portugalisë ka përfunduar me barazim pa gola, derisa Danimarka ka shënuar fitore bindëse prej 3-0 ndaj Maltës, duke marrë kreun e grupit.

Pas humbjes dëshpëruese ndaj Danimarkës, në ndeshjen e kaluar, Portugalia ka arritur të nxjerrë një pikë në udhëtim tek Suedia, duke barazuar pa gola dhe duke grumbulluar kështu katër pikë nga tre ndeshjet e para. Me pikën e fituar, Suedia grumbullon pesë pikë, dhe do të mbajë vendin e dytë në grupin 1. 

Dy gola të shënuar nga Larsen, në fillimet e të dyja pjesëve (10’ dhe 47’) dhe një tjetër nga Agger nga penaltia, pas gati gjysmë ore lojë (29’), i sollën fitoren Danimarkës si vendas ndaj Maltës. 

Me humbjen e Shqipërisë nga Hungaria, Danimarka do të marrë vendin e parë në grupin 1, derisa Malta do të mbyllë grupin me asnjë pikë. Shqipëria do të ndajë vendin e tretë me Portugalinë dhe Hungarinë.